《信報》專欄作家曹仁超，以「投資者日記」專欄享譽港台海外，長期為讀者追捧。他不但每日談股票交易、財經信息，而且窺測政壇風向、月旦政經人物，此外在專欄中也隨時拈來話題，藉題發揮，將個人的投資智慧略加鋪排點染，雖然點到即止，卻大有提神醒腦、舉重若輕的功效。

本書摘選作者專欄中具啟發性的文字編輯而成，文章不拘長短，均有趣有價值，有智慧有光采，深入淺出，舉一反三。

投資不是玩泥沙，「真金白銀」一較輸贏，不能憑意氣或運氣，要有眼光有魄力。作者積數十年財經觀察研究的心得，又在投資市場經風雨見世面，其文字中隱含的智慧，不但只與投資相關，甚且對為人處世也具啟示意義。

長篇大論的論述是學問，短小精煉的抒發要靠靈感，有時一句話足以改變一個人的一生。細讀此書，領略點滴智慧，不但出入股市有幾招傍身，而且應對世事可多幾分從容。

選載 證券分析員預測出錯率甚高

「結果往往追隨事態發展而改變，根本事前不可估計，只可分析。」

早在七十年代初期，根據賓大華爾頓商學院研究所得：人係冇預測能力。無論你係高官、教授、成功企業家或年薪二三千粒之證券分析員（世界上有冇呢種專業，我老曹愈來愈懷疑，得閑搵芳鄰原公子傾傾至得），如作預測，大部分出錯。相信對2002年作出展望結果亦係ditto，雖然唔少人認為2001年衰退，2002年可以復甦，但此乃一廂情願之推測，冇科學根據者也。其實預測好易產生跟大隊心態，許多時只係人云亦云，即係所謂「羊群心態」也——既然人地咁講，自己亦咁講，反正錯了亦有大把人陪……。換言之預測者好少有真知灼見，只係新年例行公事。事實上「結果」往往追隨事態發展而改變，根本事前不可估計，只可分析。明白此中道理，因此對任何預測皆毋須過份重視。

2002年1月1日

畢非德名言

「一個夢好少有機會發兩次。」

畢非德名言一如閣下搵到一項投資每年可升值15％，閣下已唔使做。根據「七十二法則」每年增長15％，以複利計唔使五年便翻一番，好過做專利事業矣。可惜要搵一項年增長15％的中長線投資項目依家情況下好困難。但1985年至1997年7月本港樓價平均每年升幅又何止15％（未計租金回報添）；可惜此情況在1997年7月以後已結束，恐怕在可見將來亦唔會再重複──一個夢好少有機會發兩次。

2002年1月2日

低能資金追求安樂死

「泡沫形成速度甚快，一旦破裂，卻需要極長時間才可復元。」

2000年第一季數以百億元資金投資在冇希望成功的項目上，有些項目出現唯一目的係上市吸引低能資金，唔少入市資金努力追求安樂死而已，情況有點似戰時利用戰俘在地雷陣上做開路先鋒──如果佢地冇被炸死，呢條路便代表可行。多少低能資金在2000年第一季做了開路先鋒而不自知，傷亡率咁高。2000年及2001年有幾多無名英雄已無法辨認，戰俘傷亡係因為在槍口威脅下不得不爾，但2000年入市做開路先鋒冇人迫，只係低能的表現。

展望2002年股市從「九‧一一慘劇」中恢復過來，十分正常，因為股價過份低殘，回升多少亦合理；至於復甦？似乎仍言之尚早。過去二十一個月，美國經濟表現較事前唔少經濟分析員估計更差，只係格老在2001年減息十一次，把痛楚掩蓋掉，情況有點似食止痛餅治病，感覺上唔痛，但真實病況在惡化中。1980年美股純利跌11.9％，衰退便隨之出現；1989年美股純利減少6.7％，衰退亦出現；2001年首三季純利較2000年同期已回落20.2％！不過，人們相信今年第二季開始美國經濟復甦。如果只靠減息或加息便可操控經濟，呢個世界實在太簡單太美妙了；歷史上股市泡沫早在聯儲局1913年成立前出現。聯儲局成立後，股市泡沫陸續有來，未因為有了聯儲局而人間蒸發。歷史同我地話，泡沫形成速度甚快，一旦破裂卻需要極長時間才可復元。各位信唔信2000年3月科網股泡沫破裂後只需十八個月便可復元？

1998年因為美國經濟保持繁榮，令亞洲金融危機後的亞洲經濟1999年復甦，2002年係咪另一個1998年？你話哩。1998年9月格老利用減息扭轉「乾坤」，呢次又得唔得？上一次係LCTM公司破產擔心引發骨牌效應，美國經濟未出事，只係純信心問題，但呢一次科網股泡沫確確實實在2000年第一季破裂。

2002年1月6日

曹志明，筆名曹仁超，現職信報有限公司董事，主管信報財經新聞投資分析部>一九七三年前在金融投資公司任職投資顧問，從事證券分析，加入信報五年後成為董事，並歷任多項公職，包括﹕

2001-2003 證監會「檢討中介人財務監管制度工作小組」諮詢委員

2000-2005 香港科技大學「財務學系學生會」諮詢委員

1999-2005嶺南大學「公共政策研究中心」諮詢委員

2003-2006香港公開大學李嘉誠專業進修學院財務投資文憑課程諮詢委員